កណ្ដាល៖ ស្នងការនគរបាលខេត្តកណ្ដាល លោកឧត្តមសេនីយ៍ទោ ឈឿន សុចិត្ត បានចូលរួម គោរព វិញ្ញាណក្ខន្ឋ នាយប៉ុស្តិ៍នគរបាលរដ្ឋបាលទួលព្រេជ នៃអធិការដ្ឋាននគរបាលស្រុកអង្គស្នួលលោកវរសេនីយ៍ត្រី ជុច សុភា ដែលបានពលីជីវិតក្នុងការបង្ក្រាបបទល្មើសគ្រឿងញៀន នៅឃុំទួលព្រេជ ស្រុកអង្គស្នួល ខេត្តកណ្តាល។

លោក ឈឿន សុចិត្ត បានដឹកនាំកម្លាំងនគរបាលខេត្តកណ្ដាល ចុះគោរពវិញ្ញានក្ខន្តនៅគេហដ្ឋានលោក ជុច សុភា ដោយផ្ទាល់នៅភូមិឈើបួន ឃុំម្កាក់ ស្រុកអង្គស្នួល ខេត្តកណ្តាល នាយប់ថ្ងៃទី២១ ខែមេសា ឆ្នាំ២០២២។

លោកស្នងការនគរបាលខេត្តក៏បាននាំយកថវិការបស់នាយឧត្តមសេនីយ៍អគ្គស្នងការ នគរបាលជាតិ នេត សាវឿន ចំនួន ៥,០០០,០០០រៀល ចូលបច្ច័យសពផងដែរ។

គួរឲ្យដឹងផងដែរថា នាយនគរបាលប៉ុស្តិ៍ឃុំទួលព្រិច លោក ជុច សភា នាយរងផ្នែកគ្រឿងញៀន ស្រុកអង្គស្នួល ឈ្មោះ រឹម សុផាន់ណា បានបាត់បង់ជីវិតកាលពីរសៀលថ្ងៃទី២១ ខែមេសានេះក្នុងពេលចុះប្រតិបត្តិការបង្ក្រាបមុខសញ្ញាគ្រឿងញៀន នៅស្រុកអង្គស្នូល ខេត្តកណ្តាល នឹងត្រូវជនល្មើសបាញ់តដៃសម្លាប់៕